قصة مذهلة
وزعقت: انتوبتكذبوا ليه عيب يا حبيبه عيب يا منار قوللهم حاجه يا جدو
عدي: اهدي حلا وادعي له بالرحمة
حلا بعصبية: بس بقى كفاية
وحريت على اوضتهاكان مجدي خلص مكالمته وجه قال: الدكتور بيقول هيستناها بكره في العياده عشان كده غلط ومحدش يفتح قدامها الموضوع ده
بقلم مرفت السيد
عدي: بعدين يا جدو هنعمل ايه احنا دلوقتي كلنا مسؤولين عنها مكان عمي الله يرحمه
رد الجد: لله الامر من قبل ومن بعد بكره ان شاء الله نوديها للدكتور وانتم يا جماعه لحد ما نوديها ما حدش يتكلم قدامها في حاجه هي مصدومة
يلا ادخلي يا حبيبه انتي ومنار عشان تناموا بس الاول اكلتوا ياحبايبي
منار: ايوه ماما اكلتنا وبيبة اكلت بالعافية
الجد: طيب يلا على النوم على طول تعالي يا حبيبه تعالي يا منار وحضنهم الجد وباس راسهم
وقال لحبيبة: حبيبتي انا موجود ودة امر الله
بكت وحضنته فادية شدتها لحضنها وقالت: بس يابنتي متعمليش كدة بنفسك تعالي ياحبيبتي انيمك
الجد قال لعدي ومجدي: انا كل اللي شاغلني دلوقتي يا ولاد ان حلا تبقى بخير وانا عمري ما هتخلى عنهم ابدا
عدي: ومين هيتخلى عنهم يا جدو دول ولاد عمنا مهما كان وما شفناش من عمي غير كل خير هو وبناته ده بالنسبه لي كان اب الله يرحمه ويغفر له
مجدي: يلا بينا ياعدي ننزل احنا وبكرة ناخد حلا للدكتور الساعة 7
عدي: احنا هننزل ياجدو ولو في اي حاجه اتصل بينا
طلعت فاديه قالت له: البنات ناموا وحلا كمان اتطمنت عليها ولقتها نايمة
الجد: انزلي انتي لجوزك انا بايت معاهم
ثاني يوم صحيت حلا كالعاده عماله تسأل على باباها الجد طلب منها هي واختها ومنار يلبسوا وينزلوا معاه تحت
العزاء ثلاث ايام والنهارده ثاني يوم وكان لازم يكونوا موجودين وسط الناس نزلوا والجد طلب من فاديه تأكلهم وطلب منها ما تخليش الستات اللي بيعزوا يتكلموا مع حلا في حاجه
القران اشتغل وبدأت الناس تيجي تعزي في مجموعه من زمايل منير طلبوا يقعدوا مع ابوه وواحد. منهم قاله: احنا زمايل منير ومد ايده بظرف وكارت وكمل كلامه: وده مرتبه ارجوك تديه لبناته واعتبرنا زي منير الله يرحمه لو البنات احتاجوا اي حاجه ارجوك تتصل بينا وبعد اذنك احنا هنبقى نتصل بحضرتك عشان نطمن عليهم على طول
ابتسم الجد وقال لهم يا جماعه خدوا فلوسكم مستوره والبنات هنا وسط اهلهم ما تخافوش عليهم
رد واحد تاني: حضرتك ده مش تبرع مننا ده مرتبه وحقه وبعدين منير كان انسان طيب وخدوم واحنا بنحاول نرد له جزء من جمايله فارجوك ما تحرمناش نعمل كدة
الجد: كتر خيركم وشكرا ليكم
صافحو الجد والاعمام وانصرفوا
مجدي قال ميعاد الدكتور قرب يا جدي الجد قال: ما ينفعش اسيب المعزيين القران هايبدأ في الشادر بعد.المغرب وبعد العشا
عدي قال: بعد اذنك يا جدو انا ومجدي نروح معاها
الجد: ماشي وخلوا بالكم منها
وفعلا عدي ومجدي اخدوها معاهم وهي مستسلمة تماما وفي حالة من اللاوعي
وصلو عند الدكتور الي فضل يتكلم. معاها وبعد. ماخلص قالهم: هاتجيبوها بكرة كمان هي هتحتاج اكتر من جلسة
وهما مروحين عدي قالها: حلا في اي حاجة لزماكي نشتريهالك
حلا: شوفلي بابا فين ياعدي
عدي: حاضر ياحلا هو مستفر بمأمورية تبع شغله متقلقيش
مجدي بصله وقاله: ربنا يستر بجد
حلا: اول مرة ينسى فونه بالبيت
عدي بصلها بتأثر ولما وصلو كانت نايمة عدي شالها ودخلها شقة جده وبصلها بتمعن وحزن ومسح على راسها وغطاها وخرج بهدوء
